ಹೊನ್ನಾವರದಲ್ಲಿ ನಾಡಪ್ರಭು ಕೆಂಪೇಗೌಡ ಜಯಂತ್ಯೋತ್ಸವ ಸಂಭ್ರಮ: 75 ಸಾಧಕ ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ

ಹೊನ್ನಾವರ: ಇಲ್ಲಿನ ಕೆಳಗಿನೂರಿನ ಒಕ್ಕಲಿಗರ ಸಮುದಾಯ ಭವನದಲ್ಲಿ ತಾಲೂಕಾ ಒಕ್ಕಲಿಗರ ಸಂಘ ಹಾಗೂ ಭೈರವಿ ಮಹಿಳಾ ಸಹಕಾರಿ ಸಂಘದ ಜಂಟಿ ಆಶ್ರಯದಲ್ಲಿ ‘ನಾಡಪ್ರಭು ಕೆಂಪೇಗೌಡ ಜಯಂತ್ಯೋತ್ಸವ ಹಾಗೂ ಪ್ರತಿಭಾ ಪುರಸ್ಕಾರ’ ಸಮಾರಂಭವು ಅತ್ಯಂತ ಯಶಸ್ವಿಯಾಗಿ ಜರುಗಿತು.

ಕೆಂಪೇಗೌಡರ ಆದರ್ಶ ಸರ್ವಕಾಲಿಕ: ಶ್ರೀ ನಿಶ್ಚಲಾನಂದನಾಥ ಸ್ವಾಮೀಜಿ

ಕಾರ್ಯಕ್ರಮದ ದಿವ್ಯ ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಕುಮಟಾ ಆದಿಚುಂಚನಗಿರಿ ಶಾಖಾ ಮಠದ ಶ್ರೀ ನಿಶ್ಚಲಾನಂದನಾಥ ಸ್ವಾಮೀಜಿ ಅವರು, “ನಾಡಪ್ರಭು ಕೆಂಪೇಗೌಡರು ಕೇವಲ ಒಂದು ಜಾತಿಗೆ ಅಥವಾ ಒಕ್ಕಲಿಗ ಸಮಾಜಕ್ಕೆ ಸೀಮಿತವಾದವರಲ್ಲ. ಅವರು ಎಲ್ಲಾ ಸಮುದಾಯಗಳ ಏಳಿಗೆ ಮತ್ತು ವಿಕಾಸಕ್ಕೆ ಅಪ್ರತಿಮ ಕೊಡುಗೆ ನೀಡಿದ ಮಹಾತ್ಮರು. ಬುದ್ಧ, ಬಸವಣ್ಣ, ಮಹಾವೀರ, ಗುರುನಾನಕ್, ಶಂಕರಾಚಾರ್ಯ, ನಾರಾಯಣ ಗುರು ಹಾಗೂ ಕೆಂಪೇಗೌಡರಂತಹ ಮಹಾಪುರುಷರ ಸ್ಮರಣೆಯ ಕಾರ್ಯಕ್ರಮಗಳು ಯಾವುದೇ ಒಂದು ಸಮುದಾಯಕ್ಕೆ ಸೀಮಿತವಾಗಬಾರದು. ಎಲ್ಲಾ ಸಮಾಜದವರೂ ಒಟ್ಟಾಗಿ ಆಚರಿಸಿ, ಅವರ ಆದರ್ಶಗಳಿಂದ ಪ್ರೇರಣೆ ಪಡೆಯಬೇಕು” ಎಂದು ಕರೆ ನೀಡಿದರು.

ಸಮುದಾಯದ ಏಳಿಗೆಗೆ ಸದಾ ಬೆಂಬಲ: ಶಾಸಕ ಮಂಕಾಳ ವೈದ್ಯ

ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದ ಭಟ್ಕಳ-ಹೊನ್ನಾವರ ಕ್ಷೇತ್ರದ ಶಾಸಕ ಹಾಗೂ ನಿಕಟಪೂರ್ವ ಸಚಿವರಾದ ಮಂಕಾಳ ವೈದ್ಯ ಅವರು ಮಾತನಾಡಿ, “ಕೆಂಪೇಗೌಡರಂತೆ ನಾವು ಸಮಾಜಕ್ಕೆ ಉಪಯುಕ್ತವಾದ ಬದುಕನ್ನು ನಡೆಸಿದಾಗ ಮಾತ್ರ ಜೀವನಕ್ಕೆ ಸಾರ್ಥಕತೆ ಲಭಿಸುತ್ತದೆ. ಅವರ ದಿವ್ಯ ಆದರ್ಶಗಳು ನಮಗೆಲ್ಲ ಮಾರ್ಗದರ್ಶಕವಾಗಿವೆ. ಒಕ್ಕಲಿಗ ಸಮುದಾಯದ ಎಲ್ಲಾ ಸಮಾಜಮುಖಿ ಕಾರ್ಯಗಳಿಗೆ ನನ್ನ ವೈಯಕ್ತಿಕ ಬೆಂಬಲ ಹಾಗೂ ಸರ್ಕಾರದ ಸಹಕಾರ ಸದಾ ಇರಲಿದೆ” ಎಂದು ಭರವಸೆ ನೀಡಿದರು.

75 ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ

ಇದೇ ಸಂದರ್ಭದಲ್ಲಿ ಕಳೆದ ಶೈಕ್ಷಣಿಕ ಸಾಲಿನ ಎಸ್.ಎಸ್.ಎಲ್.ಸಿ ಪರೀಕ್ಷೆಯಲ್ಲಿ ಶೇ. 90 ಕ್ಕಿಂತ ಹೆಚ್ಚು ಹಾಗೂ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ ಶೇ. 85 ಕ್ಕಿಂತ ಅಧಿಕ ಅಂಕ ಗಳಿಸಿ ಸಾಧನೆ ಮಾಡಿದ ಹೊನ್ನಾವರ ತಾಲೂಕಿನ ಒಟ್ಟು 75 ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ನಗದು ಪರಿತೋಷಕ ಹಾಗೂ ಪ್ರಶಸ್ತಿ ಪತ್ರ ನೀಡಿ ಗೌರವಿಸಲಾಯಿತು.

ತಾಲೂಕಾ ಒಕ್ಕಲಿಗರ ಸಂಘದ ಅಧ್ಯಕ್ಷರಾದ ತಿಮ್ಮಪ್ಪ ಜಿ. ಗೌಡ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಖ್ಯಾತ ವಾಗ್ಮಿ ಹಾಗೂ ಶಿಕ್ಷಕ ವಿಷ್ಣು ಪಟಗಾರ ಅವರು ಪ್ರಾಸ್ತಾವಿಕವಾಗಿ ಮಾತನಾಡಿ, ಕೆಂಪೇಗೌಡರ ಜೀವನ ಸಾಧನೆ ಹಾಗೂ ಇತಿಹಾಸವನ್ನು ಸಭೆಯ ಮುಂದಿಟ್ಟರು.
ವೇದಿಕೆಯಲ್ಲಿ ಗಣ್ಯರಾದ ಗಣಪಯ್ಯ ಕನ್ಯಾ ಗೌಡ ಮುಗಳಿ, ಕೃಷ್ಣ ಜಟ್ಟಿ ಗೌಡ ಮಾವಿನಕುರ್ವ, ಅಣ್ಣಪ್ಪ ನಾಯ್ಕ ಮಂಕಿ, ಶಾಂತಿ ಮಾದೇವ ಗೌಡ ಹಕ್ಕಲಕೇರಿ, ಮಾಬ್ಲ ಗೌಡ ಹಕ್ಕಲಕೇರಿ, ಜಿ. ಜಿ. ಶಂಕರ್, ವಾಸು ಗೌಡ ತಲಗೋಡ, ಮಂಜು ಜಟ್ಟಿ ಗೌಡ ಕಳಸನಮೋಟೆ, ತಿಮ್ಮಪ್ಪ ಮಂಜು ಗೌಡ ಹೊಳ್ಳಕುಳಿ, ಹರೀಶ ಗೌಡ ಕೆರವಳ್ಳಿ ಹಾಗೂ ಮಂಜುಳಾ ಗೌಡ ಪಡುಕುಳಿ ಉಪಸ್ಥಿತರಿದ್ದರು.
ಭೈರವಿ ಮಹಿಳಾ ಸಹಕಾರಿ ಸಂಘದ ನಿರ್ದೇಶಕರು ಪ್ರಾರ್ಥಿಸಿದರು. ದಯಾನಂದ ಗೌಡ ಸ್ವಾಗತಿಸಿದರೆ, ಬಾಲಚಂದ್ರ ಗೌಡ ವಂದನಾರ್ಪಣೆ ಮಾಡಿದರು. ಲಕ್ಷ್ಮೀಕಾಂತ ಗೌಡ ಅವರು ಇಡೀ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನಿರೂಪಿಸಿದರು.

About The Author

Bhavanishankar Naik

See author's posts