ಬಡ ಪ್ರತಿಭಾವಂತ ದಿವ್ಯಾಂಗ ವಿದ್ಯಾರ್ಥಿನಿ ಶ್ರೀರಕ್ಷಾಳ ವಿದ್ಯಾಭ್ಯಾಸ ಹಾಗೂ ಬದುಕಿಗೆ ಆಸರೆಯಾಗಿ: ಒಂದು ಮಾನವೀಯ ವಿನಂತಿ

“ಶಿಕ್ಷಣವೇ ಬದುಕಿನ ಬೆಳಕು, ಆದರೆ ಕತ್ತಲೆಯ ಹಾದಿಯಲ್ಲಿರುವ ಈ ಹೆಣ್ಣು ಮಗಳಿಗೆ ನಿಮ್ಮ ಒಂದು ಸಣ್ಣ ಸಹಾಯ ಹೊಸ ಭರವಸೆ ನೀಡಬಲ್ಲದು.”
ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನ ನಾವುಂದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ ಪ್ರಥಮ ಪಿ.ಯು.ಸಿ ವ್ಯಾಸಂಗ ಮಾಡುತ್ತಿರುವ ಶ್ರೀರಕ್ಷಾ ಎಂಬ ಈ ದಿವ್ಯಾಂಗ ವಿದ್ಯಾರ್ಥಿನಿ ಇಂದು ಕಣ್ಣೀರಿನಲ್ಲಿ ಕೈತೊಳೆಯುತ್ತಿದ್ದಾಳೆ. ಬಾಲ್ಯದಿಂದಲೇ ಅಂಗವೈಕಲ್ಯದ ಸವಾಲನ್ನು ಎದುರಿಸುತ್ತಿರುವ ಈಕೆಗೆ, ಇತ್ತೀಚೆಗಷ್ಟೇ ತಂದೆಯ ನಿಧನವಾಗಿರುವುದು ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ತಂದೆಯ ಕಳೆದುಕೊಂಡ ಬಡ ಕುಟುಂಬದ ಕರುಣಾಜನಕ ಸ್ಥಿತಿ:

ಶ್ರೀರಕ್ಷಾ ಅವರ ತಂದೆಯಾದ ಶ್ರೀಧರ ಶೆಟ್ಟಿಯವರು ಕಳೆದ 2025ರ ಅಕ್ಟೋಬರ್ 29ರಂದು ತೀವ್ರ ಹೃದಯಾಘಾತದಿಂದ ನಿಧನರಾದರು. ಮನೆಯ ಏಕೈಕ ಆಧಾರವಾಗಿದ್ದ ತಂದೆಯ ಅಗಲಿಕೆಯಿಂದ ಇಡೀ ಕುಟುಂಬ ಬೀದಿಗೆ ಬಿದ್ದಂತಾಗಿದೆ. ತಾಯಿ ಮತ್ತು ಮಗಳಿರುವ ಈ ಬಡ ಕುಟುಂಬಕ್ಕೆ ಇರಲು ಸೂಕ್ತವಾದ ಮನೆ ಕೂಡ ಇಲ್ಲ. ಮಳೆಗಾಲ ಬಂದರೆ ಮನೆ ಸೋರುತ್ತದೆ, ನೀರು ನುಗ್ಗುತ್ತದೆ. ಮನೆಗೆ ಹೋಗಲು ಸರಿಯಾದ ರಸ್ತೆ ವ್ಯವಸ್ಥೆಯೂ ಇಲ್ಲದೆ ದೈನಂದಿನ ಬದುಕು ನರಕಸದೃಶವಾಗಿದೆ.

ಅಂಗವೈಕಲ್ಯದ ನಡುವೆಯೂ ಕಾಲೇಜು ಪ್ರಯಾಣದ ಭಾರ:

ಶ್ರೀರಕ್ಷಾ ಸ್ವತಃ ಎದ್ದು ನಡೆಯಲು ಸಾಧ್ಯವಾಗದ ದಿವ್ಯಾಂಗ ಕನ್ಯೆ. ಪ್ರತಿದಿನ ತಾಯಿಯೇ ಈಕೆಯನ್ನು ಕಾಳಜಿಯಿಂದ ಆಟೋದಲ್ಲಿ ಕಾಲೇಜಿಗೆ ಕರೆದುಕೊಂಡು ಹೋಗಿ ಬರಬೇಕು. ಈ ಪ್ರಯಾಣಕ್ಕೆ ದಿನಕ್ಕೆ ₹350 ಹಾಗೂ ತಿಂಗಳಿಗೆ ಬರೋಬ್ಬರಿ ₹10,500 ವೆಚ್ಚವಾಗುತ್ತದೆ. ತಂದೆಯನ್ನು ಕಳೆದುಕೊಂಡು ಆದಾಯವಿಲ್ಲದ ಈ ಬಡ ಕುಟುಂಬಕ್ಕೆ ಈ ಬೃಹತ್ ಮೊತ್ತವನ್ನು ಭರಿಸುವುದು ಅಸಾಧ್ಯವಾಗಿದ್ದು, ಈಕೆಯ ವಿದ್ಯಾಭ್ಯಾಸವೇ ಕುಂಟಿತಗೊಳ್ಳುವ ಆತಂಕ ಎದುರಾಗಿದೆ.

ಕಷ್ಟದಲ್ಲೂ ಕಮಲದಂತೆ ಅರಳಿದ ಪ್ರತಿಭೆ:

ಇಷ್ಟೆಲ್ಲಾ ಕಷ್ಟಗಳ ನಡುವೆಯೂ ಶ್ರೀರಕ್ಷಾ ತನ್ನ ಓದನ್ನು ಬಿಟ್ಟಿಲ್ಲ.

📚 SSLC ಸಾಧನೆ: 2024-25ನೇ ಸಾಲಿನ ಎಸ್.ಎಸ್.ಎಲ್.ಸಿ ಪರೀಕ್ಷೆಯಲ್ಲಿ 551 ಅಂಕಗಳನ್ನು ಪಡೆದು ಅತ್ಯುತ್ತಮ ಶ್ರೇಣಿಯಲ್ಲಿ ಉತ್ತೀರ್ಣಳಾಗಿದ್ದಾಳೆ.
🏆 ಪ್ರತಿಭಾ ಕಾರಂಜಿ: ಆಶುಭಾಷಣ ಸ್ಪರ್ಧೆಯಲ್ಲಿ ಜಿಲ್ಲಾ ಮಟ್ಟದಲ್ಲಿ ದ್ವಿತೀಯ ಸ್ಥಾನ ಪಡೆದು ತಾಲೂಕಿಗೆ ಕೀರ್ತಿ ತಂದಿದ್ದಾಳೆ. ಹಾಡುಗಾರಿಕೆ, ಭಾಷಣ, ಚಿತ್ರಕಲೆಯಲ್ಲೂ ಈಕೆ ಅಪಾರ ಆಸಕ್ತಿ ಹೊಂದಿದ್ದಾಳೆ.

🙏 ದಯವಿಟ್ಟು ಕೈಜೋಡಿಸಿ – ನಿಮ್ಮ ಸಹಾಯ ಒಂದು ಬದುಕನ್ನು ರಕ್ಷಿಸಬಲ್ಲದು:

ಈ ದೇಶದ ಹೆಣ್ಣು ಮಗಳೊಬ್ಬಳ ವಿದ್ಯಾಭ್ಯಾಸ ಅರ್ಧಕ್ಕೆ ನಿಲ್ಲಬಾರದು, ಆಕೆಯ ಸಾಧನೆಯ ಕನಸುಗಳು ಕಮರಿಹೋಗಬಾರದು. ಉದಾರ ಮನಸ್ಸಿನ ದಾನಿಗಳು, ಸಾಮಾಜಿಕ ಸಂಸ್ಥೆಗಳು ಹಾಗೂ ಸಾರ್ವಜನಿಕರು ಶ್ರೀರಕ್ಷಾಳ ಕಾಲೇಜು ಪ್ರಯಾಣದ ವೆಚ್ಚ ಹಾಗೂ ವಿದ್ಯಾಭ್ಯಾಸಕ್ಕೆ ತಮ್ಮ ಕೈಲಾದ ಆರ್ಥಿಕ ಸಹಾಯವನ್ನು ಮಾಡಿ ಆಕೆಯ ಬದುಕಿಗೆ ಬೆಳಕಾಗಬೇಕಾಗಿ ವಿನಂತಿ.