ವನ್ಯಜೀವಿ ಸಪ್ತಾಹ–2026ಕ್ಕೆ ಚಾಲನೆ: ಉರಗ ಸಂರಕ್ಷಣೆಯಲ್ಲಿ ತೊಡಗಿರುವ ಆರು ಸಾಧಕರಿಗೆ ಸನ್ಮಾನ

ಭಟ್ಕಳ: ಹೊನ್ನಾವರ ವಿಭಾಗ ಹಾಗೂ ಭಟ್ಕಳ ಉಪವಿಭಾಗ ಅರಣ್ಯ ಇಲಾಖೆಯ ಆಶ್ರಯದಲ್ಲಿ, ಇಲ್ಲಿನ ಸಾಲುಮರದ ತಿಮ್ಮಕ್ಕ ವೃಕ್ಷ ಉದ್ಯಾನವನದಲ್ಲಿ ಅಕ್ಟೋಬರ್ 2ರಿಂದ 8ರವರೆಗೆ ಆಯೋಜಿಸಲಾಗಿರುವ ‘ವನ್ಯಜೀವಿ ಸಪ್ತಾಹ–2026’ಕ್ಕೆ ಚಾಲನೆ ನೀಡಲಾಯಿತು.

ಇದೇ ಸಂದರ್ಭದಲ್ಲಿ ವನ್ಯಜೀವಿ ಸಂರಕ್ಷಣೆ ಹಾಗೂ ಉರಗ ರಕ್ಷಣೆಯಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿರುವ ಆರು ಸಾಧಕರನ್ನು ಗೌರವಿಸಿ ಸನ್ಮಾನಿಸಲಾಯಿತು. ಹಿರಿಯ ಸಿವಿಲ್ ನ್ಯಾಯಾಧೀಶೆ ರೂಪಶ್ರೀ ಅವರು ಕಾರ್ಯಕ್ರಮವನ್ನು ಉದ್ಘಾಟಿಸಿದರು.

ಗಣ್ಯರ ನುಡಿ ಹಾಗೂ ಪ್ರಮುಖ ಜಾಗೃತಿ ಸಂದೇಶಗಳು:

ರೂಪಶ್ರೀ (ಹಿರಿಯ ಸಿವಿಲ್ ನ್ಯಾಯಾಧೀಶರು): “ಸಂವಿಧಾನದ 51ಎ ವಿಧಿಯ ಪ್ರಕಾರ ನೈಸರ್ಗಿಕ ಪರಿಸರ ಹಾಗೂ ವನ್ಯಜೀವಿಗಳನ್ನು ಸಂರಕ್ಷಿಸುವುದು ಪ್ರತಿಯೊಬ್ಬ ನಾಗರಿಕನ ಮೂಲಭೂತ ಕರ್ತವ್ಯ. ಸರ್ಕಾರದ ಕಾನೂನುಗಳ ಅರಿವು ಬೆಳೆಸಿಕೊಂಡು ಜೀವಿಗಳ ಬಗ್ಗೆ ಅನುಕಂಪ ತೋರಬೇಕು.”

ಯೋಗೀಶ್ ಸಿ.ಕೆ. (ಅಧ್ಯಕ್ಷೀಯ ನುಡಿ): “ದಾನ-ಧರ್ಮದ ಹೆಸರಿನಲ್ಲಿ ರಸ್ತೆಬದಿಯ ಕೋತಿ ಹಾಗೂ ಪಕ್ಷಿಗಳಿಗೆ ಆಹಾರ ನೀಡುವುದನ್ನು ನಿಲ್ಲಿಸಬೇಕು. ಇದರಿಂದ ಪ್ರಾಣಿಗಳು ರಸ್ತೆಗೆ ಬಂದು ‘ರೋಡ್ ಕಿಲ್’ ಆಗುವ ಹಾಗೂ ಮಾನವ-ವನ್ಯಜೀವಿ ಸಂಘರ್ಷ ಹೆಚ್ಚುವ ಅಪಾಯವಿದೆ. ಮೂಢನಂಬಿಕೆಗಳಿಂದ ದೂರವಿದ್ದು ವೈಜ್ಞಾನಿಕ ಅರಿವು ಬೆಳೆಸಿಕೊಳ್ಳಬೇಕು.”

ಹಸ್ತಾ ಶೆಟ್ಟಿ (ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ): “ಈ ಬಾರಿಯ ಸಪ್ತಾಹದಲ್ಲಿ ಕಾಡಿನ ಪ್ರಾಣಿಗಳ ಜೊತೆಗೆ ಕಡಲತೀರದ ಸಮುದ್ರ ಜೀವವೈವಿಧ್ಯ ಸಂರಕ್ಷಣೆಗೂ ಹೆಚ್ಚಿನ ಒತ್ತು ನೀಡಲಾಗುತ್ತಿದೆ.”

ಶ್ರೀನಾಥ್ ಪೈ (ಪ್ರಾಂಶುಪಾಲರು): ಜೆನ್-ಝಿ ಹಾಗೂ ಜೆನ್-ಆಲ್ಫಾ ಯುವ ಪೀಳಿಗೆಯಲ್ಲಿ ಪರಿಸರ ಕಾಳಜಿ ಮೂಡಿಸಲು ಇಂತಹ ಕಾರ್ಯಕ್ರಮಗಳು ಸಹಕಾರಿ ಎಂದರು.

ವಿಶೇಷ ಶ್ಲಾಘನೆ ಹಾಗೂ ಗೌರವ: ಸ್ವಂತ ವೆಚ್ಚದಲ್ಲಿ ಗಿಡಗಳಿಗೆ ಬೇಲಿ ನಿರ್ಮಿಸಿ, ಅವುಗಳನ್ನು ನಿರಂತರವಾಗಿ ಪೋಷಿಸುತ್ತಿರುವ ಭಟ್ಕಳದ ಹಿರಿಯ ನಾಗರಿಕ ಎಂ.ಆರ್. ನಾಯಕ್ ಅವರ ಪರಿಸರ ಸೇವೆಯನ್ನು ವೇದಿಕೆಯಲ್ಲಿ ವಿಶೇಷವಾಗಿ ಶ್ಲಾಘಿಸಲಾಯಿತು.

ಕಾರ್ಯಕ್ರಮದಲ್ಲಿ ಪ್ರಧಾನ ಸಿವಿಲ್ ನ್ಯಾಯಾಧೀಶೆ ದೀಪಾ ಅರಳಗುಂಡಿ, ಹೆಚ್ಚುವರಿ ಸಿವಿಲ್ ನ್ಯಾಯಾಧೀಶೆ ಅರ್ಪಿತಾ, ಹೊನ್ನಾವರ ಎಸಿಎಫ್ ವಿಜಯಕುಮಾರ ಕಾಳಪ್ಪನವರ, ಕುಮಟಾ ಎಸಿಎಫ್ ಮಂಜುನಾಥ ಎನ್. ಸೇರಿದಂತೆ ಇಲಾಖೆಯ ಅಧಿಕಾರಿಗಳು, ವಿವಿಧ ಸಂಘಟನೆಗಳ ಪದಾಧಿಕಾರಿಗಳು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.