'ಕಂಸವಧೆ' ತಾಳಮದ್ದಳೆಗೆ ಪ್ರೇಕ್ಷಕರು ಸಮ್ಮೋಹಿತ; ಕಲಾವಿದ ಡಾ. ಗಣಪತಿ ಭಟ್ಟ ಸಂಕದಗುಂಡಿ ಅವರಿಗೆ ಸನ್ಮಾನ

ಶಿರಸಿ: ವಿಶ್ವಶಾಂತಿ ಸೇವಾ ಟ್ರಸ್ಟ್ ಕರ್ನಾಟಕದ ವತಿಯಿಂದ ನಗರದ ಟಿಎಂಎಸ್ ಸಭಾಂಗಣದಲ್ಲಿ ಆಯೋಜಿಸಲಾಗಿದ್ದ ‘ಕಂಸವಧೆ’ ತಾಳಮದ್ದಳೆ ಪ್ರಸಂಗವು ಪ್ರೇಕ್ಷಕರ ಮನಸೂರೆಗೊಂಡಿತು. ನಾಲ್ಕು ಗಂಟೆಗಳ ಕಾಲ ನಡೆದ ಈ ಪೌರಾಣಿಕ ಕಥಾನಕದಲ್ಲಿ ಅಧರ್ಮದ ಪತನ ಹಾಗೂ ಧರ್ಮದ ವಿಜಯವನ್ನು ಕಲಾವಿದರು ಅತ್ಯಂತ ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟರು.

ಹಿರಿಯ ಮತ್ತು ಹೊಸ ತಲೆಮಾರಿನ ಅಪರೂಪದ ಕಲಾ ಸಮ್ಮಿಲನಕ್ಕೆ ಸಾಕ್ಷಿಯಾದ ಈ ಕಾರ್ಯಕ್ರಮದಲ್ಲಿ ಸಭಾಂಗಣ ತುಂಬಿ ತುಳುಕುವಷ್ಟು ಪ್ರೇಕ್ಷಕರು ಭಾಗವಹಿಸಿದ್ದರು.

ಕಲಾ ವೈಭವ: ಕಂಸನ ಅಹಂಕಾರ ಹಾಗೂ ಕೃಷ್ಣನ ಶಾಂತ-ಧರ್ಮದ ನಿಲುವಿನ ನಡುವಿನ ಸಂಘರ್ಷವನ್ನು ಕಲಾವಿದರು ಸಂಭಾಷಣೆ ಮತ್ತು ಅಭಿನಯದ ಮೂಲಕ ರೋಮಾಂಚನಕಾರಿಯಾಗಿ ನಿರೂಪಿಸಿದರು.

ಹಿಮ್ಮೇಳ-ಮುಮ್ಮೇಳ: ಕೊಳಗಿ ಕೇಶವ ಹೆಗಡೆ ಹಾಗೂ ರವಿ ಮೂರೂರು ಭಾಗವತಿಕೆಯಲ್ಲಿ ಕಥೆಗೆ ಜೀವ ತುಂಬಿದರೆ, ಶಂಕರ ಭಾಗವತ ಯಲ್ಲಾಪುರ (ಮದ್ದಳೆ) ಹಾಗೂ ಪ್ರಸನ್ನ ಹೆಗ್ಗಾರ್ (ಚೆಂಡೆ) ಸಾಥ್ ನೀಡಿದರು. ಪಾತ್ರಧಾರಿಗಳಾಗಿ ವಿ. ಉಮಾಕಾಂತ ಭಟ್ಟ (ಕೃಷ್ಣ), ಡಾ. ಗಣಪತಿ ಭಟ್ಟ ಸಂಕದಗುಂಡಿ (ಕಂಸ), ಮೋಹನ ಭಾಸ್ಕರ ಹೆಗಡೆ ಹೆರವಟ್ಟ (ಬಲರಾಮ) ಹಾಗೂ ವಿನಯ ಹೊಸ್ತೋಟ (ಅಕ್ರೂರ) ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾದರು.

ಸಾಧಕರಿಗೆ ಗೌರವ: ‘ಶ್ರೀಮದ್ವಾಲ್ಮೀಕಿ ರಾಮಾಯಣದಲ್ಲಿನ ಧರ್ಮಶಾಸ್ತ್ರದ ಚಿಂತನೆ’ ಸಂಸ್ಕೃತ ಮಹಾಪ್ರಬಂಧಕ್ಕೆ ಪಿಎಚ್.ಡಿ. ಪದವಿ ಪಡೆದ ಹಿರಿಯ ಕಲಾವಿದ ಡಾ. ವಿ. ಗಣಪತಿ ಭಟ್ಟ ಸಂಕದಗುಂಡಿ ಅವರನ್ನು ಹಾಗೂ ಕಾರ್ಯಕ್ರಮ ಸಂಯೋಜಿಸಿದ ವಿನಯ ಹೊಸ್ತೋಟ ಅವರನ್ನು ಇದೇ ಸಂದರ್ಭದಲ್ಲಿ ಸನ್ಮಾನಿಸಲಾಯಿತು.

ಕಾರ್ಯಕ್ರಮದಲ್ಲಿ ವಿ. ಉಮಾಕಾಂತ ಭಟ್ಟ ಕೆರೇಕೈ, ಬಿವಿಟಿ ಕಾರ್ಯನಿರ್ವಾಹಕ ನಿರ್ದೇಶಕ ಮೋಹನ ಭಾಸ್ಕರ ಹೆಗಡೆ, ಟ್ರಸ್ಟ್ ಉಪಾಧ್ಯಕ್ಷ ರಮೇಶ ಹಳೆಕಾನಗೋಡ, ಕಾರ್ಯದರ್ಶಿ ಗಾಯತ್ರೀ ರಾಘವೇಂದ್ರ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು. ರಾಘವೇಂದ್ರ ಬೆಟ್ಟಕೊಪ್ಪ ಕಾರ್ಯಕ್ರಮ ನಿರೂಪಿಸಿದರು.