ಭಟ್ಕಳದಲ್ಲಿ ನಾಲ್ಕನೇ ಶುದ್ಧ ಕುಡಿಯುವ ನೀರಿನ ಘಟಕಕ್ಕೆ ಶಿಲಾನ್ಯಾಸ

‘ಜನರಿಗೆ ಶುದ್ಧ ನೀರು ಒದಗಿಸುವುದು ಪುಣ್ಯದ ಕಾರ್ಯ’: ಮೌಲಾನಾ ಮಕ್ಬೂಲ್ ಕೊಬ್ಬಟ್ಟೆ

ಭಟ್ಕಳ: ಜನರಿಗೆ ಶುದ್ಧ ಕುಡಿಯುವ ನೀರನ್ನು ಒದಗಿಸುವುದು ಅತ್ಯಂತ ಶ್ರೇಷ್ಠ ಮಾನವೀಯ ಸೇವೆಯ ಜೊತೆಗೆ ಪುಣ್ಯದ ಕಾರ್ಯವೂ ಆಗಿದೆ ಎಂದು ಮೌಲಾನಾ ಮಕ್ಬೂಲ್ ಕೊಬ್ಬಟ್ಟೆ ಹೇಳಿದರು.

ಭಟ್ಕಳ ಮುಸ್ಲಿಂ ಯೂತ್ ಫೆಡರೇಶನ್ (BMYF) ವತಿಯಿಂದ ಸ್ಥಾಪಿಸಲಾಗುತ್ತಿರುವ ನಾಲ್ಕನೇ ನೀರಿನ ಘಟಕದ ಶಿಲಾನ್ಯಾಸ ಕಾರ್ಯಕ್ರಮವು ಸೋಮವಾರ ಜಾಮಿಯಾ ಇಸ್ಲಾಮಿಯಾ ಎದುರಿನ ಜಾಮಿಯಾ ಆಬಾದ್ ರಸ್ತೆಯ ಸೈಯದೀನಾ ಇಬ್ರಾಹಿಂ ಜುಮ್ಮಾ ಮಸೀದಿ ಆವರಣದಲ್ಲಿ ಜರುಗಿತು.

ಶಿಲಾನ್ಯಾಸ ನೆರವೇರಿಸಿ, ಯೋಜನೆಯ ಯಶಸ್ಸಿಗಾಗಿ ವಿಶೇಷ ದುವಾ ನೆರವೇರಿಸಿ ಮಾತನಾಡಿದ ಮೌಲಾನಾ ಮಕ್ಬೂಲ್ ಕೊಬ್ಬಟ್ಟೆ, “ಶುದ್ಧ ಕುಡಿಯುವ ನೀರು ಪ್ರತಿಯೊಬ್ಬರ ಮೂಲಭೂತ ಅಗತ್ಯ. ಸಾರ್ವಜನಿಕರಿಗೆ ನೀರಿನ ಸೌಲಭ್ಯ ಕಲ್ಪಿಸುವ ಇಂತಹ ಕಾರ್ಯಗಳಿಗೆ ಇಸ್ಲಾಂ ಧರ್ಮದಲ್ಲೂ ಹೆಚ್ಚಿನ ಮಹತ್ವವಿದೆ” ಎಂದರು. ಅಲ್ಲದೆ, BMYF ಸಂಸ್ಥೆಯ ಸಮಾಜಮುಖಿ ಸೇವಾ ಕಾರ್ಯಗಳನ್ನು ಶ್ಲಾಘಿಸಿ, ನೂತನ ಘಟಕವು ಸ್ಥಳೀಯರಿಗೆ ಸದ್ಬಳಕೆಯಾಗಲಿ ಎಂದು ಹಾರೈಸಿದರು.

ಗಣ್ಯರ ಉಪಸ್ಥಿತಿ: ಕಾರ್ಯಕ್ರಮದಲ್ಲಿ ಮಜ್ಲಿಸೇ ಇಸ್ಲಾಹ್ ವ ತಂಝೀಮ್‌ನ ಪ್ರಧಾನ ಕಾರ್ಯದರ್ಶಿ ಮೌಲವಿ ಅಝೀಝುರ್ ರಹ್ಮಾನ್, BMYF ಅಧ್ಯಕ್ಷ ಮೌಲಾನಾ ವಸಿಉಲ್ಲಾ, ಪ್ರಧಾನ ಕಾರ್ಯದರ್ಶಿ ಮುಬಶ್ಶಿರ್ ಹಲ್ಲಾರೆ, ಖಜಾಂಚಿ ರಮೀಝ್ ಕೋಲಾ, ಸಾಮಾಜಿಕ ಕಾರ್ಯದರ್ಶಿ ಝಹೀರ್ ಶೈಖ್, ಅಲ್ ಜಾಮಿಯಾ ಕ್ರೀಡಾ ಕಾರ್ಯದರ್ಶಿ ಸಲೀಮ್ ಅಲ್ಜಿ, ಸೈಯದೀನಾ ಇಬ್ರಾಹಿಂ ಜುಮ್ಮಾ ಮಸೀದಿಯ ಅಧ್ಯಕ್ಷ ಹಾಫಿಝ್ ಜಮಾಲ್ ಹುಸೈನ್ ಕಾವಾ, ತೆಂಗಿನಗುಂಡಿ ಮಾರ್ಕಝಿ ಜಮಾಅತುಲ್ ಮುಸ್ಲಿಮೀನ್‌ನ ಪ್ರಧಾನ ಕಾರ್ಯದರ್ಶಿ ಅಬ್ದುಲ್ಲಾ ದಾನಿಶ್, ಮೌಲಾನಾ ಇಕ್ಬಾಲ್ ಬಂಗಾಳಿ, ಮೌಲಾನಾ ಇಸ್ಮಾಯಿಲ್ ಡಾಂಗಿ ನದ್ವಿ, ಅಮ್ಜದ್ ಇಬ್ಬು ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

BMYF ಸಂಸ್ಥೆಯು ತಾಲೂಕಿನಲ್ಲಿ ಈಗಾಗಲೇ ಮೂರು ಘಟಕಗಳನ್ನು ಯಶಸ್ವಿಯಾಗಿ ನಡೆಸುತ್ತಿದ್ದು, ಇದೀಗ ನಾಲ್ಕನೇ ನೀರಿನ ಘಟಕ ಸ್ಥಾಪನೆಗೆ ಮುಂದಾಗಿರುವುದು ಭಟ್ಕಳದಲ್ಲಿ ಶುದ್ಧ ಕುಡಿಯುವ ನೀರಿನ ಅಭಾವ ನೀಗಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.