ವರುಣನ ಕೃಪೆಗಾಗಿ ಕೂಡ್ಲಿಗಿಯಲ್ಲಿ ಕತ್ತೆ, ಕಪ್ಪೆಗಳ ಅದ್ದೂರಿ ಮದುವೆ: ಭರ್ಜರಿ ಮೆರವಣಿಗೆ!

ಕೂಡ್ಲಿಗಿ (ವಿಜಯನಗರ): ಮುಂಗಾರು ಮಳೆ ಕೈಕೊಟ್ಟ ಹಿನ್ನೆಲೆಯಲ್ಲಿ ಕಂಗಾಲಾಗಿರುವ ರೈತರು ಹಾಗೂ ಆಸ್ತಿಕ ಬಂಧುಗಳು ವರುಣ ದೇವನನ್ನು ಒಲಿಸಿಕೊಳ್ಳಲು ಜಾನಪದ ಸಾಂಪ್ರದಾಯಿಕ ಆಚರಣೆಯ ಮೊರೆ ಹೋಗಿದ್ದು, ಪಟ್ಟಣದಲ್ಲಿ ಕತ್ತೆ ಹಾಗೂ ಕಪ್ಪೆಗಳ ಅದ್ದೂರಿ ಮದುವೆ ಮತ್ತು ಭರ್ಜರಿ ಮೆರವಣಿಗೆಯನ್ನು ನಡೆಸಿದರು.

ಏಪ್ರಿಲ್ 13 ರಿಂದಲೇ ಮಳೆಗಾಲದ ನಕ್ಷತ್ರಗಳು ಆರಂಭಗೊಂಡಿದ್ದರೂ ಕೂಡ್ಲಿಗಿ ಕ್ಷೇತ್ರದಲ್ಲಿ ಈವರೆಗೆ ಸಮರ್ಪಕ ಮಳೆಯಾಗಿಲ್ಲ. ಅಶ್ವಿನಿ, ಭರಣಿ, ಕೃತ್ತಿಕಾ, ರೋಹಿಣಿ ನಕ್ಷತ್ರಗಳು ಮುಗಿದು ಜೂನ್ 8 ರಿಂದ ಮೃಗಶಿರಾ ನಕ್ಷತ್ರ ಆರಂಭಗೊಂಡಿದೆ. ಜೂನ್ 22 ಕ್ಕೆ ಆರಿದ್ರಾ ಮಳೆ ಬರಬೇಕಿದೆ. ಆದರೆ, ಮಳೆರಾಯನ ದರ್ಶನ ಭಾಗ್ಯವಿಲ್ಲದೆ ಬಿತ್ತನೆ ಮಾಡಿದ ರೈತರು ಕಂಗಾಲಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ವರುಣನ ಕೃಪೆಗಾಗಿ ಜೂನ್ 19ರ ಶುಕ್ರವಾರದಂದು ಪಟ್ಟಣದ ಪೇಟೆಬಸವೇಶ್ವರ ನಗರದಲ್ಲಿ ಈ ವಿಶೇಷ ಆಚರಣೆ ಹಮ್ಮಿಕೊಳ್ಳಲಾಗಿತ್ತು.

ಶಾಸ್ತ್ರೋಕ್ತ ಮದುವೆ, ಸಕಲ ವೈಭವದ ಮೆರವಣಿಗೆ

ಪಟ್ಟಣದ ಶ್ರೀ ಪೇಟೆಬಸವೇಶ್ವರ ದೈವಸ್ಥರು, ಹಿರಿಯರು, ಮಹಿಳೆಯರು, ಯುವಕರು ಹಾಗೂ ಮಕ್ಕಳು ಒಗ್ಗೂಡಿ ಈ ವಿಶಿಷ್ಟ ಮದುವೆಯನ್ನು ನೈಜ ವಿವಾಹದಂತೆಯೇ ನೆರವೇರಿಸಿದರು.

ಮಧುಮಗ-ಮಧುಮಗಳ ಶೃಂಗಾರ: ಬೆಳ್ಳಂಬೆಳಗ್ಗೆ ಗಂಡು-ಹೆಣ್ಣು ಕತ್ತೆಗಳನ್ನು ಹಾಗೂ ಕಪ್ಪೆಗಳನ್ನು ತಂದು, ಅವುಗಳಿಗೆ ಅರಿಶಿನ ಹಚ್ಚಿ, ಹೊಸ ಬಟ್ಟೆ ತೊಡಿಸಿ, ಹೂವಿನ ಮಾಲೆ ಹಾಕಿ ವಧು-ವರರಂತೆ ಶೃಂಗರಿಸಲಾಯಿತು.

ಭರ್ಜರಿ ಮೆರವಣಿಗೆ: ಮಂಗಳ ವಾದ್ಯಗಳ ಮೇಳದೊಂದಿಗೆ ನವ ದಂಪತಿಗಳಾದ ಕತ್ತೆ ಹಾಗೂ ಕಪ್ಪೆಗಳ ಜೋಡಿಯನ್ನು ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಭರ್ಜರಿಯಾಗಿ ಮೆರವಣಿಗೆ ಮಾಡಲಾಯಿತು. ಮೆರವಣಿಗೆಯು ಶ್ರೀ ಪೇಟೆಬಸವೇಶ್ವರ ದೇವಸ್ಥಾನ ಸೇರಿದಂತೆ ಪಟ್ಟಣದ ಆರಾಧ್ಯ ದೇವತೆಗಳ ಸನ್ನಿಧಿಗೆ ಸಾಗಿ ದರ್ಶನ ಪಡೆದು, ಮಳೆಗಾಗಿ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಯಿತು.

ಮದುವೆ ಮಂಟಪದಲ್ಲಿ ಕಂಕಣ ಭಾಗ್ಯ: ಶ್ರೀ ಪೇಟೆಬಸವೇಶ್ವರ ದೇವಸ್ಥಾನದ ಅಂಗಳದಲ್ಲಿ ಕಲಾತ್ಮಕವಾಗಿ ಮದುವೆ ಮಂಟಪವನ್ನು ಸಿದ್ಧಪಡಿಸಿ, ವಾದ್ಯ-ಮೇಳ, ಅಕ್ಷತೆ ಹಾಗೂ ಪೂಜಾ ಕೈಂಕರ್ಯಗಳೊಂದಿಗೆ ಕತ್ತೆ ಮತ್ತು ಕಪ್ಪೆಗಳಿಗೆ ಶಾಸ್ತ್ರೋಕ್ತವಾಗಿ ಕಂಕಣ ಧಾರಣೆ ಮಾಡಲಾಯಿತು.

ಗೊರ್ಜಿಗಂಗೆ ಪೂಜೆ, ಸಾಮೂಹಿಕ ಭೋಜನ

ಮದುವೆಯ ಅಂತಿಮ ಘಟ್ಟವಾಗಿ ದೈವಸ್ಥರೆಲ್ಲರೂ ಸೇರಿ ವಿಶೇಷ ಪೂಜೆ ನೆರವೇರಿಸಿದರು. ಸಾಂಪ್ರದಾಯದಂತೆ ಬಾಲಕನೊಬ್ಬನ ತಲೆಯ ಮೇಲೆ ಗಂಗೆಯುಳ್ಳ ಮಡಕೆಯನ್ನಿಟ್ಟು ಮೆರವಣಿಗೆ ಮಾಡುವ ಮೂಲಕ ‘ಗೊರ್ಜಿಗಂಗೆ’ ಪೂಜೆಯನ್ನು ನೆರವೇರಿಸಲಾಯಿತು. ಬಳಿಕ ನೆರೆದಿದ್ದ ನೂರಾರು ಭಕ್ತಾದಿಗಳಿಗೆ ಸಾಮೂಹಿಕ ಭೋಜನ ಪ್ರಸಾದ ವ್ಯವಸ್ಥೆ ಮಾಡಲಾಗಿತ್ತು.

ನವದಂಪತಿ ಜೋಡು ಕತ್ತೆಗಳ ಹಾಗೂ ಕಪ್ಪೆಗಳ ಕೂಗಿಗೆ ಮಳೆ ತರುವ ಶಕ್ತಿಯಿದೆ ಎಂಬುದು ಇಲ್ಲಿನ ಗ್ರಾಮೀಣ ಭಾಗದ ಜನರ ಅಚಲ ನಂಬಿಕೆಯಾಗಿದೆ. ಈ ಆಚರಣೆಗಳು ವಿಜ್ಞಾನ ಅಥವಾ ತರ್ಕಕ್ಕೆ ನಿಲುಕದಿದ್ದರೂ, ಭಾರತೀಯ ಸಂಸ್ಕೃತಿಯಲ್ಲಿ ಪ್ರಕೃತಿಯನ್ನು ಆರಾಧಿಸುವ ಮತ್ತು ಪರಿಸರದ ಮೇಲಿಟ್ಟಿರುವ ಅಪಾರ ಭಕ್ತಿಯನ್ನು ಪ್ರತಿಬಿಂಬಿಸುತ್ತವೆ