ಪಂಡಿತ್ ಗಣಪತಿ ಭಟ್ ಹಾಸಣಗಿಗೆ 'ಮಹಾಬಲ ಪ್ರಶಸ್ತಿ' ಪ್ರದಾನ

ಗುಣವಂತೆ: “ಯಕ್ಷಗಾನದಲ್ಲಿ ನಟನಿಗೆ ಭಾವಸ್ಪೂರ್ತಿ, ನೃತ್ಯ ಪ್ರಚೋದನೆ ಮತ್ತು ಶಾಸ್ತ್ರೀಯ ರಂಗಪ್ರಜ್ಞೆ ನೀಡುವ ನಿಯಂತ್ರಕ ಶಕ್ತಿಯೇ ಭಾಗವತನ ಸಂಗೀತದ ಲಯ ಜ್ಞಾನ. ಇಂತಹ ಹಿನ್ನೆಲೆಯಲ್ಲಿ ಹಿಂದುಸ್ತಾನಿ ಸಂಗೀತದ ಮೇರು ಗಾಯಕ ಪಂ. ಗಣಪತಿ ಭಟ್ ಹಾಸಣಗಿ ಅವರಿಗೆ ‘ಮಹಾಬಲ ಪ್ರಶಸ್ತಿ’ ಪ್ರದಾನ ಮಾಡಿರುವುದು ಅತ್ಯಂತ ಯೋಗ್ಯವಾಗಿದೆ” ಎಂದು ಯಕ್ಷಗಾನ ಸಾಹಿತ್ಯ ತಜ್ಞ ಹಾಗೂ ವಿಮರ್ಶಕ ಡಾ. ಸಿ. ಆನಂದರಾಮ ಉಪಾಧ್ಯ ಅಭಿಪ್ರಾಯಪಟ್ಟಿದ್ದಾರೆ.

ಇಲ್ಲಿನ ಡಾ. ಕೆರೆಮನೆ ಮಹಾಬಲ ಹೆಗಡೆ ರಂಗ ಪ್ರತಿಷ್ಠಾನದ ವತಿಯಿಂದ ಆಯೋಜಿಸಲಾಗಿದ್ದ ಮಹಾಬಲ ಹೆಗಡೆ ಮತ್ತು ರಾಮ ಹೆಗಡೆ ಸಂಸ್ಮರಣೆ ಹಾಗೂ ಪ್ರಶಸ್ತಿ ಪ್ರದಾನ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ಯಕ್ಷಗಾನವು ಸುಧಾರಣೆಯುಳ್ಳ ಕಲೆಯಾಗಬೇಕು ಎನ್ನುವ ಮಹಾಬಲ ಹೆಗಡೆಯವರ ಆಶಯವನ್ನು ಮಂಡಿಸುತ್ತಾ, ಪ್ರಸ್ತುತ ಯಕ್ಷಗಾನದ ರಂಗಸ್ಥಳ, ಬೆಳಕು, ವಸ್ತ್ರವಿನ್ಯಾಸ ಹಾಗೂ ಕುಣಿತದ ಶೈಲಿಗಳಲ್ಲಿ ಬದಲಾವಣೆ ಕಾಣುತ್ತಿದ್ದರೂ ಪರಂಪರೆಯ ಚೌಕಟ್ಟು ಮೀರುತ್ತಿರುವ ಅಪಾಯದ ಬಗ್ಗೆ ಸೂಚ್ಯವಾಗಿ ಎಚ್ಚರಿಸಿದರು. ಮಹಾಬಲ ಹೆಗಡೆಯವರ ಮೊಮ್ಮಕ್ಕಳಾದ ಶಶಾಂಕ ಹಾಗೂ ಕಿಶೋರ ಅವರು ತಮ್ಮ ಅಜ್ಜ ಮತ್ತು ತಂದೆಯವರ ಕಲಾ ಸಾಧನೆಯನ್ನು ಸಂಸ್ಮರಿಸುವ ಕಾರ್ಯ ಪ್ರಶಂಸನೀಯ ಎಂದರು.

‘ಮಹಾಬಲ ಹೆಗಡೆಯವರು ನನ್ನ ಸಂಗೀತದ ಗುರು’: ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಪಂ. ಗಣಪತಿ ಭಟ್ ಹಾಸಣಗಿ, “ಯಕ್ಷಗಾನ ಕ್ಷೇತ್ರದಲ್ಲಿ ಅದ್ವಿತೀಯ ಸ್ಥಾನ ಹೊಂದಿದ್ದ ಮಹಾಬಲ ಹೆಗಡೆಯವರು ಹಿಂದುಸ್ತಾನಿ ಸಂಗೀತದಲ್ಲೂ ಅಪಾರ ಜ್ಞಾನ ಹೊಂದಿದ್ದರು. ನನ್ನ ಅಂತರಂಗದಲ್ಲಿ ಹಿಂದುಸ್ತಾನಿ ಸಂಗೀತದ ಪ್ರಭೆಯನ್ನು ವಿಕಾಸಗೊಳಿಸಿದ ಅವರನ್ನು ಗುರುವೆಂದು ಸ್ವೀಕರಿಸಿದ್ದೇನೆ. ಈ ಪ್ರಶಸ್ತಿ ಪಡೆದಿರುವುದು ನನಗೆ ಅತ್ಯಂತ ಸಂತೋಷ ತಂದಿದೆ” ಎಂದರು.

ಖ್ಯಾತ ತಬಲಾ ವಾದಕ ಪಂ. ಗೋಪಾಲಕೃಷ್ಣ ಹೆಗಡೆ ಕಲ್ಭಾಗ ಅಭಿನಂದನಾ ನುಡಿಗಳನ್ನಾಡಿದರು. ಎನ್.ಜಿ. ಭಟ್ ಮಾಳ್ಕೋಡ ಸನ್ಮಾನ ಪತ್ರ ವಾಚಿಸಿದರು. ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದ ಕೃಷ್ಣಮೂರ್ತಿ ಭಟ್ ಶಿವಾನಿ ಹಾಗೂ ಡಾ. ನರಸಿಂಹಮೂರ್ತಿ ಪಂಡಿತರು ಹಿರಿಯ ಕಲಾವಿದರ ಕೊಡುಗೆ ಮತ್ತು ಬದ್ಧತೆಯನ್ನು ಸ್ಮರಿಸಿದರು.

ಗಣೇಶ ಯಾಜಿ ಮಾವಿನಕೆರೆ ಗಣಪತಿ ಸ್ತುತಿ ನೆರವೇರಿಸಿದರೆ, ಶಶಾಂಕ ಹೆಗಡೆ ಪ್ರಾಸ್ತಾವಿಕವಾಗಿ ಮಾತನಾಡಿ ಸ್ವಾಗತಿಸಿದರು. ಪ್ರತಿಷ್ಠಾನದ ಅಧ್ಯಕ್ಷೆ ನಾಗವೇಣಿ ಹೆಗಡೆ ಕೆರೆಮನೆ ಹಾಗೂ ಪಂ. ಪರಮೇಶ್ವರ ಹೆಗಡೆ ಕಲ್ಭಾಗ ಉಪಸ್ಥಿತರಿದ್ದರು. ಪ್ರತಿಷ್ಠಾನದ ಕಾರ್ಯದರ್ಶಿ ಎಲ್.ಎಂ. ಹೆಗಡೆ ಕೆರೆಮನೆ ಕಾರ್ಯಕ್ರಮ ನಿರೂಪಿಸಿ, ಕಿಶೋರ ಹೆಗಡೆ ವಂದಿಸಿದರು.

ರಂಜಿಸಿದ ‘ಕೀಚಕ ವಧೆ’ ಯಕ್ಷಗಾನ: ಸಭಾ ಕಾರ್ಯಕ್ರಮದ ಬಳಿಕ ನಡೆದ ‘ಕೀಚಕ ವಧೆ’ ಯಕ್ಷಗಾನ ಪ್ರಸಂಗವು ಪ್ರೇಕ್ಷಕರ ಮನ ಗೆದ್ದಿತು. ಶಶಾಂಕ ಹೆಗಡೆ (ಕೀಚಕ), ಕಿಶೋರ ಹೆಗಡೆ (ವಲಲ), ಶಿವರಾಮ ಹೆಗಡೆ ಕೆರೆಮನೆ (ಸುದೇಷ್ಣೆ), ಕೃಷ್ಣಕುಮಾರ (ಸೈರಂಧ್ರಿ), ನಾಗಪ್ಪ ಗೌಡ (ವಿಜಯ), ಜಿ.ಎನ್. ಹೆಗಡೆ ಬೇರಂಕಿ (ವಿರಾಟ) ಹಾಗೂ ಗಣೇಶ ಹೆಗಡೆ ಶಿಗಡಿ (ಸಖಿ) ಅಭಿನಯಿಸಿ ಪ್ರದರ್ಶನವನ್ನು ಯಶಸ್ವಿಗೊಳಿಸಿದರು.