ಗುಂಡ್ಲುಪೇಟೆ: PLD ಬ್ಯಾಂಕ್‌ ಚುನಾವಣೆಯಲ್ಲಿ ಬಿಜೆಪಿ ಜಯಭೇರಿ!

ಗುಂಡ್ಲುಪೇಟೆ: ತಾಲೂಕು ಪ್ರಾಥಮಿಕ ಸಹಕಾರ ಕೃಷಿ ಮತ್ತು ಗ್ರಾಮೀಣ ಅಭಿವೃದ್ಧಿ (PLD) ಬ್ಯಾಂಕಿನ ಆಡಳಿತ ಮಂಡಳಿ ಚುನಾವಣೆಯು ತೀವ್ರ ಜಿದ್ದಾಜಿದ್ದಿ ಹಾಗೂ ಪ್ರಬಲ ಪೈಪೋಟಿಯಿಂದ ಜರುಗಿದ್ದು, ಬಿಜೆಪಿ ಬೆಂಬಲಿತ ಅಭ್ಯರ್ಥಿಗಳು ಅಭೂತಪೂರ್ವ ಜಯ ಗಳಿಸಿದ್ದಾರೆ.

ಹಲವು ದಶಕಗಳಿಂದ ಮಾಜಿ ಶಾಸಕ ಸಿ.ಎಸ್. ನಿರಂಜನ್ ಕುಮಾರ್ ಅವರ ತಂದೆ ಸಿ.ಎಂ. ಶಿವಮಲ್ಲಪ್ಪ ಅವರ ಬೆಂಬಲಿಗರು ಈ ಬ್ಯಾಂಕಿನ ಅಧಿಕಾರ ಹಿಡಿದು ಸತತವಾಗಿ ಗೆಲ್ಲುತ್ತಾ ಬಂದಿದ್ದರು. ದಿವಂಗತ ಹೆಚ್.ಎಸ್. ಮಹದೇವ ಪ್ರಸಾದ್ ಅವರ ಕಾಲದಿಂದಲೂ ಬ್ಯಾಂಕ್ ಬೋರ್ಡ್‌ನಲ್ಲಿ ಬಿಜೆಪಿಯದ್ದೇ ವರ್ಚಸ್ಸು ಮುಂದುವರಿದಿತ್ತು. ಈ ಬಾರಿಯೂ ತೀವ್ರ ಕುತೂಹಲ ಮೂಡಿಸಿದ್ದ ಈ ಚುನಾವಣೆ ಅತ್ಯಂತ ಮಹತ್ವ ಪಡೆದುಕೊಂಡಿತ್ತು.

ಚುನಾವಣಾ ಫಲಿತಾಂಶದ ವಿವರ:

ಬ್ಯಾಂಕಿನ ಒಟ್ಟು 14 ನಿರ್ದೇಶಕ ಸ್ಥಾನಗಳ ಪೈಕಿ, 1 ಸರ್ಕಾರಿ ನಾಮಿನಿಯದ್ದಾಗಿದೆ.

ಅವಿರೋಧ ಆಯ್ಕೆ: ಮೀಸಲಿದ್ದ 2 ಕ್ಷೇತ್ರಗಳ ಪೈಕಿ ಮಹಿಳಾ ಕ್ಷೇತ್ರದಿಂದ ಕಾಂಗ್ರೆಸ್ ಹಾಗೂ ಎಸ್‌ಟಿ ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.
ಚುನಾವಣಾ ಫಲಿತಾಂಶ: ಬಾಕಿ ಉಳಿದ 12 ಕ್ಷೇತ್ರಗಳಿಗೆ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್ 2 ಕ್ಷೇತ್ರಗಳಲ್ಲಿ ಜಯಗಳಿಸಿದರೆ, ಉಳಿದ 10 ಕ್ಷೇತ್ರಗಳನ್ನು ಬಿಜೆಪಿ ಬೆಂಬಲಿತ ಅಭ್ಯರ್ಥಿಗಳು ತಮ್ಮದಾಗಿಸಿಕೊಂಡಿದ್ದಾರೆ.

ರೈತರ ಕಾರ್ಯಕ್ರಮದಲ್ಲಿ ಚೇರ್ ಎಸೆದ ಶಾಸಕರಿಗೆ ನಾಚಿಕೆಯಾಗಬೇಕು: ನಿರಂಜನ್ ಕುಮಾರ್ ವಾಗ್ದಾಳಿ

ಗೆಲುವು ಸಾಧಿಸಿದ ಬಿಜೆಪಿ ಸದಸ್ಯರನ್ನು ಅಭಿನಂದಿಸಿ ಮಾತನಾಡಿದ ಮಾಜಿ ಶಾಸಕ ಸಿ.ಎಸ್. ನಿರಂಜನ್ ಕುಮಾರ್:

”ರೈತರು ಬಿಜೆಪಿ ಮೇಲೆ ನಂಬಿಕೆಯಿಟ್ಟು ಒಮ್ಮತದಿಂದ ಮತ ಚಲಾಯಿಸಿದ್ದಾರೆ. ಬಿಜೆಪಿ ಅಧಿಕಾರದಲ್ಲಿದ್ದಾಗ ಕೆರೆಗಳಿಗೆ ನೀರು ತುಂಬಿಸಿ ರೈತರ ಹಿತ ಕಾಯುವ ಕೆಲಸ ಮಾಡಿತ್ತು. ಆದರೆ ಕಳೆದ ಮೂರು ವರ್ಷಗಳಿಂದ ಅಧಿಕಾರದಲ್ಲಿರುವ ಶಾಸಕ ಹೆಚ್.ಎಂ. ಗಣೇಶ್ ಪ್ರಸಾದ್ ರೈತರಿಗೆ ಯಾವುದೇ ಅನುಕೂಲ ಮಾಡಿಕೊಟ್ಟಿಲ್ಲ.”

ಮುಂದುವರಿದು ಮಾತನಾಡಿದ ಅವರು, “ಭಾಗದ ಅಭಿವೃದ್ಧಿ ಬಗ್ಗೆ ರೈತರು ಪ್ರಶ್ನಿಸಿದಾಗ, ಕಾರ್ಯಕ್ರಮದಲ್ಲೇ ಭಾವೋದ್ವೇಗಕ್ಕೆ ಒಳಗಾಗಿ ಚೇರ್ ಎಸೆಯುವಂತಹ ಶಾಸಕರು ನಮಗಿದ್ದಾರೆ ಎನ್ನಲು ನಾಚಿಕೆಗೇಡಿನ ಸಂಗತಿ” ಎಂದು ತೀವ್ರವಾಗಿ ವಾಗ್ದಾಳಿ ನಡೆಸಿದರು.

ಈ ಸಂದರ್ಭದಲ್ಲಿ ಬಿಜೆಪಿ ತಾಲೂಕು ಮಂಡಲ ಅಧ್ಯಕ್ಷ ಸಿ. ಮಹದೇವಪ್ರಸಾದ್, ಪ್ರಮುಖ ಮುಖಂಡರಾದ ಜಿ.ಡಿ.ಎಲ್. ಸುರೇಶ್ ಕನ್ನೇಗಾಲ, ಡಿ. ಮಾದಪ್ಪ ಸ್ವಾಮಿ, ಎಸ್.ಸಿ. ಮಂಜುನಾಥ್, ಉದ್ಯಮಿ ಮಲ್ಲೇಶ್ ಮಾಡ್ರಹಳ್ಳಿ, ಲೋಕೇಶ್, ಅಗತಗೌಡನಹಳ್ಳಿ ಬಸವರಾಜು, ಮಳವಳ್ಳಿ ಮಹೇಶ್, ಹುಂಡಿಪುರ ಮಂಜುನಾಥ್, ಗುಡಿಮನೆ ಅಭಿಷೇಕ್, ಚೌಡಹಳ್ಳಿ ನಂದೀಶ್, ಹಂಗಳ ಬಸವೇಶ್, ಹನೀಫ್, ತಿರುಪತಿ, ನಾಗೇಶ್ ಸೇರಿದಂತೆ ನೂರಾರು ಕಾರ್ಯಕರ್ತರು ಉಪಸ್ಥಿತರಿದ್ದರು. ವರದಿ : ಸದಾನಂದ ಕನ್ನೆಗಾಲ ಗುಂಡ್ಲುಪೇಟೆ.