ಪರಿಸರ ಸೂಕ್ಷ್ಮ ವಲಯ (ESZ) ಅಧಿಸೂಚನೆ ವಿರೋಧಿಸಿ ಕೇಂದ್ರಕ್ಕೆ ಆಕ್ಷೇಪಣಾ ಪತ್ರ ಸಲ್ಲಿಸಲು ಅರಣ್ಯ ಭೂಮಿ ಸಾಗುವಳಿದಾರರ ಹೋರಾಟ ಸಮಿತಿ ಕರೆ

ಹೊನ್ನಾವರ: ಪಶ್ಚಿಮ ಘಟ್ಟ ವ್ಯಾಪ್ತಿಯ ಉತ್ತರ ಕನ್ನಡ ಜಿಲ್ಲೆಯನ್ನು ಪರಿಸರ ಸೂಕ್ಷ್ಮ ವಲಯ (ESZ) ಎಂದು ಘೋಷಿಸಿರುವ ಕೇಂದ್ರ ಸರ್ಕಾರದ ಕರಡು ಅಧಿಸೂಚನೆಯನ್ನು ವಿರೋಧಿಸಿ, ಕೇಂದ್ರ ಅರಣ್ಯ ಮತ್ತು ಪರಿಸರ ಸಚಿವಾಲಯಕ್ಕೆ ಲಿಖಿತ ಆಕ್ಷೇಪಣೆ ಸಲ್ಲಿಸುವಂತೆ ‘ಉತ್ತರ ಕನ್ನಡ ಜಿಲ್ಲಾ ಅರಣ್ಯ ಭೂಮಿ ಸಾಗುವಳಿದಾರರ ಹೋರಾಟ ಸಮಿತಿ ಹೊನ್ನಾವರ’ ಜಿಲ್ಲೆಯ ರೈತರು ಹಾಗೂ ಸಾರ್ವಜನಿಕರಲ್ಲಿ ಮನವಿ ಮಾಡಿದೆ.

ಆಕ್ಷೇಪಣೆಯ ಪ್ರಮುಖ ಅಂಶಗಳು:
- ಜನಸಾಂದ್ರತೆ ಹಾಗೂ ಜೀವನಾಧಾರ: ಕಸ್ತೂರಿ ರಂಗನ್ ವರದಿ ಅನ್ವಯ ಜಿಲ್ಲೆಯ 567 ಹಳ್ಳಿಗಳನ್ನು ಪರಿಸರ ಸೂಕ್ಷ್ಮ ಪ್ರದೇಶ (ESA) ವ್ಯಾಪ್ತಿಗೆ ಸೇರಿಸಲಾಗಿದ್ದು, ಇವು ಅಧಿಕ ಜನಸಾಂದ್ರತೆ, ಸಾಂಸ್ಕೃತಿಕ ಪರಂಪರೆ ಮತ್ತು ಕೃಷಿ-ತೋಟಗಾರಿಕೆ ಆಧಾರಿತ ಪ್ರದೇಶಗಳಾಗಿವೆ.
- ರೈತರ ಹಿತರಕ್ಷಣೆ ಹಾಗೂ ವಿನಾಯಿತಿಗೆ ಆಗ್ರಹ: ಈ ಅಧಿಸೂಚನೆಯಿಂದ ಸುಮಾರು 3 ಲಕ್ಷ ಅರಣ್ಯ ಭೂಮಿ ಸಾಗುವಳಿದಾರರು, ರೈತರು ಮತ್ತು ಕೃಷಿ ಕಾರ್ಮಿಕರು ವಸತಿರಹಿತ ಹಾಗೂ ಉದ್ಯೋಗರಹಿತರಾಗುವ ಭೀತಿಯಲ್ಲಿದ್ದಾರೆ. ಆದ್ದರಿಂದ ಕಂದಾಯ ಗ್ರಾಮಗಳು, ಪಟ್ಟಾ ಜಮೀನು, ಗೋಮಾಳ, ಬೆಟ್ಟ ಭೂಮಿ ಹಾಗೂ 31-12-2015 ಕ್ಕೂ ಪೂರ್ವದ ಅತಿಕ್ರಮಣ/ಸಾಗುವಳಿ ಭೂಮಿಗೆ ಅಧಿಸೂಚನೆಯಿಂದ ವಿನಾಯಿತಿ ನೀಡಬೇಕು.
- ಸಾಂಪ್ರದಾಯಿಕ ಹಕ್ಕುಗಳ ರಕ್ಷಣೆ: ಸ್ಥಳೀಯ ಹಕ್ಕುಗಳು, ನೀರು, ಕೃಷಿ ಹಕ್ಕುಗಳು ಹಾಗೂ ಮರಳು ಮತ್ತು ಕೆಂಪು ಕಲ್ಲು ತೆರವುಗೊಳಿಸುವ ಸಾಂಪ್ರದಾಯಿಕ ಹಕ್ಕುಗಳನ್ನು ಕಾಯ್ದುಕೊಳ್ಳಲು ಕೇಂದ್ರ ಸಚಿವ ಭೂಪೇಂದರ್ ಯಾದವ್ ಹಾಗೂ ಪ್ರಧಾನಮಂತ್ರಿಗಳು ಮಧ್ಯಪ್ರವೇಶಿಸಿ ಜಿಲ್ಲೆಯ 10 ಲಕ್ಷ ಜನರನ್ನು ರಕ್ಷಿಸಬೇಕೆಂದು ಒತ್ತಾಯಿಸಲಾಗಿದೆ.
ಆಕ್ಷೇಪಣೆ ಸಲ್ಲಿಸುವ ಮಾರ್ಗ: ಸಾರ್ವಜನಿಕರು ಹಾಗೂ ರೈತರು ಸಿದ್ಧಪಡಿಸಿದ ಮಾದರಿ ಆಕ್ಷೇಪಣಾ ಪತ್ರವನ್ನು ಇ-ಮೇಲ್ ([email protected]) ಅಥವಾ ಅಂಚೆ ಮೂಲಕ ಕೇಂದ್ರ ಸರ್ಕಾರಕ್ಕೆ ರವಾನಿಸುವಂತೆ ಸಮಿತಿಯು ಕೋರಿದೆ.