ಮುರುಡೇಶ್ವರದಲ್ಲಿ ಪೊಲೀಸರ ಮೇಲೆಯೇ ಚಾಕು ದಾಳಿ: ಪ್ರಮುಖ ಆರೋಪಿ 'ಕಡ್ಡಿ ರಾಜು' ಸೇರಿ ಐವರ ಬಂಧನ!

ಭಟ್ಕಳ: ತಾಲೂಕಿನ ವಿಶ್ವಪ್ರಸಿದ್ಧ ಪ್ರವಾಸಿ ತಾಣ ಮುರುಡೇಶ್ವರದಲ್ಲಿ ತಡರಾತ್ರಿ ಸಂಭವಿಸಿದ ಗಲಾಟೆಯನ್ನು ತಡೆಯಲು ಹೋದ ಪೊಲೀಸ್ ಸಿಬ್ಬಂದಿಯ ಮೇಲೆಯೇ ಚಾಕುವಿನಿಂದ ಭೀಕರವಾಗಿ ದಾಳಿ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮುರುಡೇಶ್ವರ ಪೊಲೀಸರು ಐವರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಪ್ರಮುಖ ಆರೋಪಿ ರಾಜು ಅಲಿಯಾಸ್ **‘ಕಡ್ಡಿ ರಾಜು’**ನನ್ನು ಉಡುಪಿ ಜಿಲ್ಲೆಯ ಬೈಂದೂರಿನಲ್ಲಿ ಸೆರೆಹಿಡಿಯಲಾಗಿದೆ.

ಆಗಸ್ಟ್ 9ರ ತಡರಾತ್ರಿ ಮುರುಡೇಶ್ವರ ನಾಕಾ ಬಳಿಯ ‘ಪ್ರಜಾ ಜ್ಯೂಸ್ ಸೆಂಟರ್’ ಸಮೀಪ ಜಗಳ ನಡೆಯುತ್ತಿರುವ ಕುರಿತು ಠಾಣೆಗೆ ಮಾಹಿತಿ ಲಭಿಸಿತ್ತು. ತಕ್ಷಣವೇ ಕಾರ್ಯಪ್ರವೃತ್ತರಾದ ರಾತ್ರಿ ಗಸ್ತಿನಲ್ಲಿದ್ದ ಪೊಲೀಸ್ ಸಿಬ್ಬಂದಿ ವಿನಾಯಕ ಶೆಟ್ಟಿ ಹಾಗೂ ಸಂಗಪ್ಪ ಹರಿಜನ ಸ್ಥಳಕ್ಕೆ ತೆರಳಿದ್ದರು.

ಅಲ್ಲಿ ಮನೋಜ್ ಎಂಬಾತನ ಮೇಲೆ ಕೆಲವರು ಚಾಕುವಿನಿಂದ ಹಲ್ಲೆ ನಡೆಸಲು ಮುಂದಾಗಿದ್ದನ್ನು ಕಂಡ ಪೊಲೀಸರು, ಮಧ್ಯಪ್ರವೇಶಿಸಿ ತಡೆಯಲು ಪ್ರಯತ್ನಿಸಿದ್ದಾರೆ. ಈ ವೇಳೆ ಆಕ್ರೋಶಗೊಂಡ ಆರೋಪಿಗಳು ಪೊಲೀಸರ ಕರ್ತವ್ಯಕ್ಕೆ ಅಡ್ಡಿಪಡಿಸಿ, ಅವರ ಮೇಲೆಯೇ ತಿರುಗಿಬಿದ್ದು ಚಾಕುವಿನಿಂದ ಹಲ್ಲೆ ನಡೆಸಿದ್ದಾರೆ.

ದಾಳಿಯ ವಿವರ: ಆರೋಪಿ ಹೃತಿಕ್ ಮಾದೇವ ನಾಯ್ಕ ಚಾಕುವಿನಿಂದ ಸಿಬ್ಬಂದಿ ವಿನಾಯಕ ಶೆಟ್ಟಿ ಅವರ ಕೈಗೆ ಇರಿದು ಗಾಯಗೊಳಿಸಿದರೆ, ಪ್ರಮುಖ ಆರೋಪಿ ರಾಜು ಮಾದೇವ ನಾಯ್ಕ ಸಂಗಪ್ಪ ಹರಿಜನ ಅವರ ಕೈಗೆ ಚಾಕುವಿನಿಂದ ಇರಿದಿದ್ದಾನೆ. ದಾಳಿಯ ನಂತರ ಪೊಲೀಸರಿಗೆ ಜೀವ ಬೆದರಿಕೆ ಹಾಕಿ ಆರೋಪಿಗಳು ಕಾಲ್ಕಿತ್ತಿದ್ದರು.

ಬೈಂದೂರಿನಲ್ಲಿ ಪ್ರಮುಖ ಆರೋಪಿ ಸೆರೆ:

ಘಟನೆ ನಡೆದ ತಕ್ಷಣ ಕಾರ್ಯಾಚರಣೆ ಆರಂಭಿಸಿದ ಮುರುಡೇಶ್ವರ ಪೊಲೀಸರು ಆರೋಪಿಗಳಾದ ರಾಜು ಮಾದೇವ ನಾಯ್ಕ, ಹೃತಿಕ್ ಮಾದೇವ ನಾಯ್ಕ, ಮದನ ನಾಯ್ಕ, ಯೋಗೇಶ್ ನಾಯ್ಕ ಹಾಗೂ ದರ್ಶನ ನಾಯ್ಕ ಅವರನ್ನು ಬಂಧಿಸಿದ್ದಾರೆ.

ಪೋಲಿಸರ ಕಣ್ಣು ತಪ್ಪಿಸಿ ತಲೆಮರೆಸಿಕೊಂಡಿದ್ದ ಪ್ರಮುಖ ಆರೋಪಿ ‘ಕಡ್ಡಿ ರಾಜು’ ಬೈಂದೂರಿನಲ್ಲಿದ್ದಾನೆ ಎಂಬ ನಿಖರ ಮಾಹಿತಿ ಕಲೆಹಾಕಿದ ಪೊಲೀಸರು ಆತನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಹೈಕೋರ್ಟ್‌ನಿಂದ ಗಡಿಪಾರು ರದ್ದು – ಮತ್ತೆ ಕೃತ್ಯ!

ಬಂಧಿತ ಆರೋಪಿಗಳ ಪೈಕಿ ಕೆಲವರು ಹಳೆಯ ಅಪರಾಧ ಹಿನ್ನೆಲೆ ಹೊಂದಿದ್ದಾರೆ. ರಾಜು ಅಲಿಯಾಸ್ ಕಡ್ಡಿ ರಾಜು ಹಾಗೂ ಆತನ ಸಹೋದರ ಹೃತಿಕ್ ವಿರುದ್ಧ ಈ ಹಿಂದೆ ಪೊಲೀಸ್ ಇಲಾಖೆಯು ಗಡಿಪಾರು ಆದೇಶ ಜಾರಿಗೊಳಿಸಿತ್ತು. ಆದರೆ ಹೈಕೋರ್ಟ್ ಈ ಆದೇಶವನ್ನು ವಜಾಗೊಳಿಸಿತ್ತು. ಇದೀಗ ಇದೇ ಸಹೋದರರು ಮತ್ತೆ ಪೊಲೀಸರ ಮೇಲೆಯೇ ಚಾಕು ದಾಳಿ ನಡೆಸಿ ಜೈಲು ಪಾಲಾಗಿದ್ದಾರೆ.

ಎಸ್ಪಿ ದೀಪನ್ ಎನ್.ಎಂ. ಕಟ್ಟುನಿಟ್ಟಿನ ಸೂಚನೆ:

ಕರ್ತವ್ಯನಿರತ ಸಿಬ್ಬಂದಿಯ ಮೇಲೆಯೇ ಹಲ್ಲೆ ನಡೆಸಿರುವುದನ್ನು ಉತ್ತರ ಕನ್ನಡ ಜಿಲ್ಲಾ ಪೊಲೀಸ್ ಇಲಾಖೆ ತೀರಾ ಗಂಭೀರವಾಗಿ ಪರಿಗಣಿಸಿದೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (SP) ದೀಪನ್ ಎನ್.ಎಂ. ಅವರು ಪ್ರಕರಣದಲ್ಲಿ ಭಾಗಿಯಾದ ಪ್ರತಿಯೊಬ್ಬರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ. ಪ್ರಕರಣದ ಕುರಿತು ಪೊಲೀಸರು ಹೆಚ್ಚಿನ ತನಿಖೆ ಮುಂದುವರಿಸಿದ್ದಾರೆ.