ಹೊಯ್ಸಳ ವಾಸ್ತುಶಿಲ್ಪ ಶೈಲಿಯಲ್ಲಿ ಕಲ್ಲಹಳ್ಳಿಯ ಶ್ರೀ ಲಕ್ಷ್ಮಿ ವರಹನಾಥ ದೇವಾಲಯ ಅಭಿವೃದ್ಧಿ: ಡಾ. ಶ್ರೀನಿವಾಸ ರಾಘವನ್

ಕೃಷ್ಣರಾಜಪೇಟೆ: ತಾಲೂಕಿನ ಕಲ್ಲಹಳ್ಳಿಯಲ್ಲಿರುವ ಭೂದೇವಿ ಸಮೇತ ಶ್ರೀ ಲಕ್ಷ್ಮಿ ವರಹನಾಥ ದೇವಾಲಯವನ್ನು ತಿರುಮಲ-ತಿರುಪತಿ ಮಾದರಿಯಲ್ಲಿ ಹೊಯ್ಸಳ ವಾಸ್ತುಶಿಲ್ಪ ಕಲಾ ವೈಭವದೊಂದಿಗೆ ಮೂರು ವರ್ಷಗಳಲ್ಲಿ ಪೂರ್ಣಗೊಳಿಸಲಾಗುವುದು ಎಂದು ದೇವಾಲಯದ ವ್ಯವಸ್ಥಾಪನಾ ಸಮಿತಿ ಸಂಚಾಲಕ ಡಾ. ಶ್ರೀನಿವಾಸ ರಾಘವನ್ ತಿಳಿಸಿದರು. ಶ್ರಾವಣ ಮಾಸದ ರೇವತಿ ನಕ್ಷತ್ರದ ಅಂಗವಾಗಿ ಆಯೋಜಿಸಿದ್ದ ವಿಶೇಷ ಪೂಜಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ವಿಶೇಷ ಅಭಿಷೇಕ ಹಾಗೂ ಕಲ್ಯಾಣೋತ್ಸವ: 17 ಅಡಿ ಎತ್ತರದ ಸಾಲಿಗ್ರಾಮ ಶಿಲೆಯ ಭೂವರಹನಾಥ ಮೂರ್ತಿಗೆ 1,000 ಲೀಟರ್ ಹಾಲು, 500 ಲೀಟರ್ ಎಳನೀರು, ಕಬ್ಬಿನ ಹಾಲು, ಶ್ರೀಗಂಧ, ಜೇನುತುಪ್ಪ ಸೇರಿದಂತೆ 58 ಬಗೆಯ ಹೂವುಗಳಿಂದ ಪುಷ್ಪಾಭಿಷೇಕ, ಪಟ್ಟಾಭಿಷೇಕ ಹಾಗೂ ಶ್ರೀನಿವಾಸ ಕಲ್ಯಾಣೋತ್ಸವ ನೆರವೇರಿಸಲಾಯಿತು.

₹150 ಕೋಟಿ ವೆಚ್ಚದ ದೇವಾಲಯ ನಿರ್ಮಾಣ: ಪರಕಾಲ ಮಠದ ಶ್ರೀ ಪರಕಾಲ ಸ್ವಾಮೀಜಿಗಳ ಸಂಕಲ್ಪದಂತೆ ₹150 ಕೋಟಿ ವೆಚ್ಚದಲ್ಲಿ ಕಾಮಗಾರಿ ನಡೆಯುತ್ತಿದೆ. ದೊಡ್ಡಬಳ್ಳಾಪುರದ ಕೊಯ್ರಾದಿಂದ ಗ್ರಾನೈಟ್ ತಂದು ಸಿ.ಎನ್‌.ಸಿ (CNC) ತಂತ್ರಜ್ಞಾನ ಹಾಗೂ ರಾಜಸ್ಥಾನ, ತಮಿಳುನಾಡು, ಪ್ರಯಾಗ್‌ರಾಜ್‌ನ ಶಿಲ್ಪಿಗಳ ನೆರವಿನಿಂದ ಕೆತ್ತನೆ ಮಾಡಲಾಗುತ್ತಿದೆ.

ಗೋಪುರ ಹಾಗೂ ಮಂಟಪಗಳು: ಎರಡನೇ ಪ್ರಾಕಾರದಲ್ಲಿ 36 ಅಡಿಯ 3 ಗೋಪುರಗಳು ಹಾಗೂ 56 ಅಡಿಯ ಮುಖ್ಯ ಗೋಪುರ ನಿರ್ಮಾಣ ಹಂತದಲ್ಲಿದೆ. ಮೂರನೇ ಪ್ರಾಕಾರದಲ್ಲಿ 186 ಅಡಿ ಎತ್ತರದ ರಾಜಗೋಪುರ ಹಾಗೂ 186 ಕಾಲುಗಳ ಮುಖಮಂಟಪ, ಮಹಾಲಕ್ಷ್ಮಿ, ಸಪ್ತಮಾತೃಕೆಯರು ಮತ್ತು ಮಹಾಗಣಪತಿ ದೇವಾಲಯಗಳನ್ನು ನಿರ್ಮಿಸಲಾಗುತ್ತಿದೆ.

ಕಾರ್ಯಕ್ರಮದಲ್ಲಿ ಮಾಜಿ ಸಚಿವ ಡಾ. ನಾರಾಯಣಗೌಡ, ಕೆ. ಶ್ರೀನಿವಾಸ್, ಟಿಎಪಿಸಿಎಂಎಸ್ ನಿರ್ದೇಶಕ ಲೋಕೇಶ್, ವಿವಿಧ ಇಲಾಖೆಗಳ ಅಧಿಕಾರಿಗಳು ಸೇರಿದಂತೆ 10 ಸಾವಿರಕ್ಕೂ ಹೆಚ್ಚು ಭಕ್ತರು ಭಾಗವಹಿಸಿ ಪ್ರಸಾದ ಸ್ವೀಕರಿಸಿದರು.                                        ವರದಿ : ಡಾ .ಕೆ ಆರ್ ನೀಲಕಂಠ ಕೃಷ್ಣರಾಜಪೇಟೆ

About The Author

Bhavanishankar Naik

See author's posts